Rahinan sané ketah kabaos “Hari Raya Nyepi” puniki sampun saking dumun kalaksanayang becik pisan olih krama Hinduné ring Bali. Majanten sampun wénten pauwahan manut aab jagat sané kasarengin. Yéning dumun wénten istilah Ngrebeg duk rahinan pangerupukan, wusan macaru, mamargi ngiderin désa antuk ngedig soroh wék-wékan belek, kulkul, kau, cekong, miwah sané lianan. Mangkin sampun nganggén saluir tetabuhan bleganjur sané sayan becik. Yéning dumun nénten madaging ngarak ogoh-ogoh. Ungkuran puniki sayan limbak pisan maweweh ogoh-ogoh, samaliha wénten lomba ogoh-ogoh.

Yéning pikayunin becik-becik, jatinipun panglaksanan éédan nyanggra rahinan Nyepi puniki prasida pinaka larapan ngrajegang tuntunan karakter krama Hinduné. Indik tuntunan karakter sané rasayang titiang, manut kadi papat pilar pendidikan karakter sané madaging (1) olah pikir, (2) olah hati, (3) olah raga, miwah (4) olah rasa lan karsa.

1. Olah Pikir

Silih sinunggil ciri olah pikir punika wantah mapikayunan sarwa becik, sané kabaos kréatif. Saking awulan sadurung rahinan Nyepi rauh, sampun akéh sané mapikayun utawi mikayunin pacang ngawéntenang lomba ogoh-ogoh, mikayunin indik parade utawi arak-arakan ogoh-ogoh. Taler krama Seka Trunané ngawitin mapikayun kréatif, sapunapi mangda madué dana anggén numbas piranti ogoh-ogoh, ogoh-ogoh napi sané jagi kakaryanin, sapasira pacang nukangin, sapunapi indik bleganjurnyané, miwah sané lianan. Kramané sané tiosan taler mapikayun, sapunapi pacang nyanggra rahinan nyepi, ring dija jagi nyepi, napi ké jagi mapuasa, miwah sané lianan. Tios malih ibu-ibu rumah tangga, dija ngrereh jinah anggén matumbasan duaning piranti upakarané sarwa mael, sapunapi indik upakara pacaruan tawur agungé, miwah sané lianan.

2. Olah Hati

Ciri utama olah hati puniki numbuhang saha nincapang rasa sradha bhakti ring Ida Sang Hyang Wiudhi Wasa. Maderbé rasa sumakuta (tanggung jawab) mangda labdhakarya niténin rahinan Nyepi saking makiyis/malasti, nglaksanayang bhuta yadnya (pacaruan tawur agung kasanga). Wénten pikayunan jengah, rasa wirang, rasa kémad yéning nénten mrasidayang makarya upakara madasar daging manah suci nirmala lan lascarya manut katatwaning ajahan agama Hindu. Nglantur raris olah hati ring brata panyepian. Indik nglaksanayang catur brata panyepian puniki minakadi amati geni, amati karya, amati lelunganan, miwah amati lelangunan puniki becik pisan anggén nuntun utawi nguwah karakter jadmané.

Brata Amati geni prasida anggén malajah malaksana sadu gunawan, nénten gelis duka, legawa, ngandap kasor, miwah saluiripun. Brata Amati Karya anggén dasar nglarang monobrata, ngastiti Ida Hyang Widhi mangda ring kahuripan sané jagi rauh kaicénin tuntunan pamargi sané rahayu. Brata Amati lelunganan prasida anggén nyuciang jagaté saking polusi utawi cemernyané jagaté puniki. Raris brata Amati lalanguan anggén ngret indria, mulat sarira, mangda nénten biasa ngulurin indria ngambekang momo angkara.

3. Olah Raga

Olah raga sajeroning nyanggra rahinan Nyepi puniki sampun kalaksanayang ri kalaning nyiagayang rerasmén utawi piranti upakara lan upacara. Mrika-mriki ngrereh sarana upacara, sarana makarya ogoh-ogoh, ngrereh sanggar cucuk miwah sané lianan. Maweweh raris mapauruk nabuh ring seka bleganjur, mauruk masolah ring sang sané pawai ogoh-ogoh madaging sasolahan, nglantur raris olah raga mamargi majam-jaman ri kala ngarak ogoh-ogoh.

4. Olah Rasa lan Kasra

Ciri utama karakter olah rasa lan karsa puniki wantah pangweruhan éling ring maurip pinaka mahluk sosial sané patut ngutamayang kahuripan pasuka-dukan, manyama braya, sagilik-saguluk, paras-paros, saling tulungin utawi magotong-royong. Sami puniki sampun kalaksanayang olih krama Hinduné ring Bali saking pangawit nglaksanayang pakaryan jagi nyanggra rahinan Nyepi. Yéning nénten madasar pikayunan susrusa magotong royong, janten nénten pacang puput ngaryanin ogoh-ogoh. Rasa lan karsa sané becik pacang ngwetuang pasikian kayun ngambil pakaryan ageng sané tan keni antuk ngwilangin laminipun ring banjaran.

Malarapan nglaksanayang utawi nyanggra rahinan Nyepi sané sampun katami saking riin olih krama Hinduné ring Bali makasujatinipun madué tetuek sané utama pisan. Kaping siki, nyinahang rasa sayaga nyangra warsa anyar manut tahun çaka antuk nyepiang bhuwana agung miwah bhuwana alit sané matetujon ngulati kahuripan sané sayan paripurna ri wekasan. Kaping kalih, anggén larapan nincapang tuntunan karakter para krama Hinduné saking alit-alit, yowana, miwah sang sampun ngrahasta asrama. Kaping tiga, nincapang sradhané ring Ida Hyang Widhi Wasa malarapan pamuspan ngawit malasti rauh ring monobrata panyepian. Kaping papat, ngwéntenang panyucian buana agung miwah buana alit ri kala rahina pangrupukan (tawur agung kasanga). Kaping lima, prasida anggén malajah ngret indria, mulat sarira, mucehang pikayunan momo angkara.