Uningke ida dané, mitos nglimbak ring soang-soang daérah. Mitos satata mapaiketan sareng agama, ajeng-ajengan, inuman, woh-wohan miwah sané lianan. Nanging sadurung nglantur, patut kauningin riin napi nika kasujatian “mitos” gumanti nénten ngwetuang bingung. Ngninin indik mitos ring krama sapatutné patut kaimbangin antuk pemahaman ring bidang ilmiah.

Mitos yéning sayan kaselehin pinaka penafsiran paindikan sané durung janten kasujatiannyané. Tegesnyané, mitos madasar cerita tradisional, miwah cerita sané lianan. Mitos kabaosang pinaka sejarah, penjelasan indik ritual. Daweg jamanné riin mitos kanggén utawi kalimbakang olih krama ring pakraman pinaka tuntunan, ajah-ajahan pendidikan.

Minakadi sané kabaosang i wawu, mitos wénten ring makudang-kudang paindikan. Silih tunggilnyané wantah mitos ring widang ajeng-ajengan, mitos puniki nglimbak ring Bali. Wantah daging “Penyu” kabaosang tan dados kaajeng sareng daging “Babi”, mitos puniki becik kabaosang tur patut kauningin kasujatiannyané.

Krama maosang “daging Penyu memusuh sareng daging Babi”, yéning ngajeng daging Penyu sinarengan sareng daging Babi prasida ngwetuang panyungkan diaré. Akéh krama maosang akadipunika nanging i krama durung prasida maosang napi sané ngawinang diaré inucap ? Ring sor pacang kabaosang saking sisi medis indik sakatah mitos inucap.

Manut Penyuluh Gizi saking Poli Gizi Klinik RSUP Sanglah, IG.A.A. Dastini Pm.,B.Sc. Ri kala kacunduk Buda (31/10) lintang ring RS Sanglah maosang, fénoména sané wénten ring krama punika yéning kaselehin saking sisi medis prasida kajelasang antuk dasar Analisa Bahan Makanan Hewani pinaka ukuran. “Sajeroning muktiang patut kaimbangin antuk sisi medis, mangda jelas ring krama napi sujatinné ngawinang paindikan punika,” baosnyané.

Ajeng-ajengan daging Penyu lan Babi madasar Analisa Medis Bahan Makanan Hewani prasida kauningayang kandungan komposisi nilai gizinyané sesampun kaajeng. Perbandingan Komposisi kandungan daging Penyu lan Babi sané pateh-pateh 100 gr. Kandungan Air sajeroning daging Penyu wantah 80%, yéning kandungan daging Babi 45%. Kandungan kalori sajeroning Penyu 83 (kalori) ring daging Babi 457 (kalori), kandungan protein Penyu 19,1 gr yéning ring Babi 11,9 gr, kandungan lemak Penyu 0,2 gr ring daging Babi 45 gr, kandungan karbohidrat Penyu lan Babi pateh-pateh 0 gr, kandungan calcium Penyu 27 mg yéning ring daging Babi 7 mg, kandungan posfor Penyu 87 mg ring daging Babi 117 mg, kandungan Fe Penyu 0,7 mg ring daging Babi 1,8 mg, yéning kandungan Vit A sajeroning Penyu lan Babi pateh-pateh 0 mg, yéning kandungan Vit B1 Penyu 0,20 mg yéning ring daging Babi 0,58 mg, miwah kandungan Vit C ring Penyu lan Babi pateh-pateh 0 mg.

Saking Analisa Nilai Komposisi punika prasida makanten kandungan gizinyané, wénten sané langkungan (tinggi) lan kirangan (rendah) pantaraning daging Penyu lan Babi sané kaajeng nénten seimbang, utamanné kandungan lémaknyané, minab nika silih sinunggil paindikan sané ngawinang lambung lan tubuh molihang gangguan, gumanti ngwetuang diaré kaselehin saking sisi ilmiahnyané.

Dané taler ngwewehin, ketah faktor lianan sané lumrah ngwetuang gangguan ring weteng (perut) minakadi diaré. Silih sinunggilnyané wantah faktor proses ngolah ajeng-ajengan, “Ketah faktor sané prasida ngwetuang diaré, minakadi faktor basa (Bumbu) sané kanggén masanin ajengan, faktor lianan umpaminipun wantah tata cara ngolah ajengan sané toleransi kebersihan utawi kirang higinis,” dané nlatarang.

Ajengan sané sehat wantah asupan ajengan sané imbang, tegesnyané ngajeng asupan makanan sané bersifat tenaga, bersifat membangun miwah bersifat mengatur. Ahli Gizi puniki taler mapiteket “Mitos indik ajeng-ajengan sané sampun nglimbak saking riin sampunang digelis karesepang, nanging patut kaselehin riin saking keseimbangan Nilai Gizinyané, gumanti jelas,” dané negesang.

Yéning kekaitang sareng widang upacara agama pamekasnyané ring Bali kekalih hewan punika kanggehang penting pinaka sarana nyangkepin pabuat upacara. Penyu lumrahnyané kanggén sarana ri kala upacara pecaruan ring pura sané sedek nglaksanayang upacara ageng, kanggén olahan miwah kaajeng. Babi taler pateh kanggén pinaka serana upacara, daging babi boya kabuatang ring pura kémanten nanging babi taler kawigunayang ring upacara panca yadnya. Lumrah kanggén olahan, saté, lawar, guling, pecaruan, miwah sané lianan.

Nanging, pungkuran Penyu nénten kadadosang kaajeng miwah kaejuk mapaiketan sareng Usaha Pelestarian Hewan Air sané sampun sayan langka puniki. Sakadi tindakan sané kaambil pemerintah inggih punika, “Semua jenis Penyu laut di Indonesia telah dilindungi berdasarkan Peraturan Pemerintah (PP) Nomer 7 tahun 1999 tentang Pengawetan Jenis Tumbuhan dan Satwa”. Tegesnyané sakancan bentuk perdagangan Penyu punika nénten kadadosang, minakadi sané sampun kajelasang sajeroning “Undang Undang No 5 tahun 1990 tentang Konservasi Sumber Daya Alam Hayati dan Ekosistemnya”.

Tindakan ring ajeng patut kalaksanayang mangda pretisentanané kawekas kantun prasida nyingak hewan sané prasida mayusa penyatusan warsa puniki, gumanti nénten punah.