Kajang satata mapaiketan sareng upacara pangabénan ring Bali, kawéntenan kajang nénten katentuang olih tingkatan upacara pengabénan sané kalaksanayang, inggian punika pangabénan nista, pangabénan tingkat madya, miwah pangabénan tingkat utama, sarana kajang pastika kanggén. Yéning sampun asapunika kawéntenan kajang nénten pisan prasida kalepasang saking upacara pengabénan.

Kajang wantah silih tunggil saking sakatah sarana panyakep upacara pitra yadnya. Kajang, manut Ida Pedanda Gdé Anggustha Lor Magelung daweg kacunduk ring Grya Anyar Sibangkaja, Buda (18/12) lintang maosang, kajang banget mapaiketan sareng yoni, bibit, miwah bebet. Kaselehin saking bibit inggih punika mapaiketan sareng patpat yoni. Yéning Bébét mapaiketan sareng Kesadaran, bebet nénten madasar yoni nanging ngutamayang amunapi manusa punika prasida nglintangin kesuniaan dunia (tujuh pada).

“Bébét mapaiketan sareng tingkat kualitas, poténsi pengetahuan, poténsi kecerdasan sané kaduénang sinunggil manusa inucap,” baos ida.

Kajang kasurat ring sajeroning sakatah daging lontar minakadi Lontar Puja Pitra, Lontar Puja Sawadhana, Lontar Dharma Tatwa, miwah lontar sané tiosan. Sajeroning daging lontar-lontar punika wénten kabaosang kajang pinaka surat walung kepala. Pinaka simbolis wadah manusa miwah sakancan unsur sané ngwentuk wadah manusa, umpaminipun banten miwah kajang. Sané kabaos kajang sakadi sané sering kapanggih olih krama wantah simbol wadah manusa sané kacihnayang antuk wentuk sastra utawi aksara miwah gambar sané kasuratang antuk tangan ring kain kasa sané dawa.

Sira manten sané dados nyurat aksara utawi makarya kajang ? Kepercayaan ring Bali wantah akedik krama sané dados nyurat kajang. Santukan kajang kanggehang madué nilai sakral miwah madué nilai éstetika ring pitra yadnya. “Kajang patut kakaryanin tur kaplaspas olih sulinggih utawi sang sané sampun madwijati, duaning nyurat sastra suci lan sakral minakadi kajang kauatamayang kesucian bathin saking sané makarya,” baos Ida negesang.

Kajang sané lumrah kanggén, atenga langkungan kasurat antuk aksara Bali, sajabaning taler kadagingin rerajahan minakadi bedawang nala, naga miwah sané tiosan. Sané kasurat ring kajang inggih punika sastra sané pinaka simbol panca maha bhuta wadah manusa. Sajabaning sastra, gambar taler wénten sané nganggén simbol jinah bolong (uang képéng).

Kawigunan kajang manut ida wantah pinaka utsaha ngwaliang manusa ring tingkat kesadarannyé. Kajang pinaka simbol renungan makna saking unsur panca maha bhuta, atma miwah Ida Sang Hyang Widhi Wasa. Gumanti kaaptiang manusa sadaweg maurip mangda nyelanang malajahin nelebin sastra agama. Sajabaning punika kajang taler pinaka simbolis roh utawi atma manusa.

Kajang saluiring apaket madaging tigang soroh kajang inggih punika kajang utama, kajang sari, lan kajang sané madasar antuk yoni, minakadi kajang brahmana, kajang kstria, kajang weisya, miwah kajang sudra. Soang-soang kajang punika madaging sasuratan aksara miwah gambar sané matiosan. Makatiga soroh kajang punika dados asiki ring saluiring panyangkep saking unsur-unsur upacara pangabénan.