Umat Hindu Bali sajebag Bali katah madué kapatutan ring widang agama sané mesti kalaksanayang sajeroning kahuripan maagama, inggih punika upacara sané patut kalaksanayang ring soang-soang kulewarga miwah sajeroning makrama ring Désa pakraman. Upacara punika wénten sané kamargiang sawilang rahina, sawilang wuku, ngabulan, nganem bulan, ngawarsa, ngalimang warsa, ngadasa warsa, ngasatus warsa miwah wénten taler upacara sané pinih lami kalaksanayang ngasiu warsa apisan. Upacara punika samian kalaksanayang ninutin rerahinan sané kanggehang becik madasar saptawara, pancawara, wuku, odalan sané munggah sajeroning prasasti ring pura-pura miwah lontar.

Upacara sané kalaksanayang olih umat Hindu punika silih sinunggilnyané wénten upacara sané kawastanin upacara Sad Kertih. upacara Sad Kertih wantah upacara sané lumrah kalaksanayang ring Bali. Sad Kertih manut daging lontar mawit saking kruna sad miwah kruna kertih, kruna sad madué teges nenem miwah kruna kertih mateges suci, suksmannyané nenem kesucian sané mesti kamargiang olih krama ring jagaté sajeroning ngastitiang mangda jagaté miwah sadagingnyané tetep imbang.

Sad Kertih utawi nenem kasucian sané kabaos punika minakadi sané kapertama kabaos upacara Atma Kertih wantah utsaha saking jatmané nyuciang Sang Hyang Atma (jiwa). Salanturnyané upacara Samudra Kertih inggih punika upacara sané kamargiang sajeroning nyuciang segara, yéning ring jagat sekala pinaka pralambang yoni tetujonyané ngemit mangda kahanané prasida tetep lestari lan ajeg. Upacara Danu Kertih inggih punika utsaha saking i manusa nglestaring genah klebutan toya minakadi Klebutan, Tukad, Danu miwah sané siosan. Salanturnyané, upacara Wana Kertih wantah utsaha nglestariang kahanan alas (hutan) sané wénten ring sajebag jagaté.

Siosan punika wénten taler upacara sané mawasta Jagat Kertih suksmanyané wantah utsaha ngemit paiketan becik pantaraning parahyangan inggih punika paiketan i manusa sareng Ida Sang Hyang Widhi, pawongan utawi paiketan becik i manusa sareng manusa miwah palemahan inggih punika paiketan sané becik pantaraning i manusa sareng wewidangan. Raris upacara Yana Kertih inggih punika upacara sané matetujon nyuciang déwek mangda nénten ngamangguhin gegodan prasida kalaksanayang majalaran malukat.

Upacara-upacara punika kalaksanayang antuk upacara sané matios-tiosan, pamekas upacara sané katurang majeng jagaté nganggén sarana sané ageng, sakadi upacara Samudra Kertih, Danu Kertih miwah Wana Kertih wantah upacara-upacara sané mautama sané katurang majeng jagaté. Upacara wana kertih lumrahnyané kalaksanayang ring gunung majalaran mulang pakelem sakadi kalaksanayang ring pucak Gunung Agung miwah Gunung Batur. Punika taler Tawur Agung Labuh Gentuh,mendak toya, pakelem (Danu Kertih) lan Samudra Kertih kalaksanayang majalaran melasti miwah mapakelem sané kapulang ring tengahing Danu utawi Segara minakadi ring Danu Batur lan Danu Beratan, yéning ring Segara ring Bali lumrahnyané kalaksanayang ring Segara Rupek miwah genah sané lianan nganggén sarana wewalungan sané sampun kasuciang.