Kawentenan subak ring Bali nénten prasida kapalasang sareng budaya, agama miwah kapariwisataan sané wénten ring Bali. Paiketan agama sareng organisasi sané kabaos subak puniki prasida kacingak saking kawéntenan upacara ring carik sané mawasta mabiukukungan. Upacara mabiukukungan ring Bali ring sakatah wewidangan ketah kasambat mabékukung utawi biukukung. Dresta mabiukukung puniki kalaksanayang antuk para petaniné sané madué tetanduran padi utawi pantun ring carik.

Upacara mabiukukung puniki biasané kalaksanayang antuk para petaniné ring cakangan genah toyané membah. Sajroning upacara mabiukukungan, nénten mesti kapuput olih pamangku, nanging taler prasida kabaktiang antuk sané nuwénang carik punika. Mabikukungan kalaksanayang sadurung manyi utawi ri sampuné padiné kabaos embud.

Nanging sané tawah wantah ring bebantenan sané katurang. Banten biukukung masarana antuk blayag, katipat gantusan, rujak manis, ampo, kungkang, sampian kakul, umbi-umbian minakadi kaséla, keladi, miwah umbi sané magoreng. Nénten lali nganggén nyah-nyah geringsing, baas kuning, kacang-kacangan miwah godoh lan sanganan lianan sané kaperluang.

Banten pangoak kagenahang ring sanggah cucuk sané kaiasin antuk ambu. Banten pangoak kagantungan ring sanggahé punika. Ri sampuné usan mabiukukungan, banten pangoak nénten dados kasurud. Wénten malih surudan banten minakadi kungkang, nyah-nyah geringsing, baas kuning miwah sané siosan kaanyudang ring cakangan genah toyané membah. Yéning umbi-umbiannyané katandur ring cariké punika, tetujonnyané mangda tetandurané landuh.

Mabiukukungan pinaka sinalih tunggil tradisi sané kantun kalestariang olih krama Baliné utamanipun krama sané madué carik. upacara mabiukukungan kalaksanayang antuk umat hindu maka cihna ngaturang rasa parama suksma majeng ida Sang Hyang Widhi Wasa.