Manut sakadi punapi sané sampun kaperah ring Bali utaman ipun mantuka ring karma Hindu maderbé wewarisan saking kana kuni kawarisin olih para leluhur sané mungguh ring lontar, inggih punika aksara wewilangan utawi ketékan. Ketékan inucap inggih punika asiki, kekalih, tetiga, patpat, lelima, nemnem, pepitu, akutus, sia. Ring ajeng wilangan asiki wenten malih wilangan puyung utawi windu (nol). Yan basé kaperah ipun puyung, besik, dadua, tetelu, patpat, nemnem, pepitu, akutus, sia. Basa kawin ipun windu, eka, dwi, tri, catur, panca, sad, sapta, asta, sanga.

Niténin punapi sané mungguh ring ajeng aksara wawilangan inucap wantah sia akéh ipun maweweh aksara wawilangan windu (nol). Yéning nyuratang wilangan solas aksara wilangan siki kasandingang sareng aksara wilangan siki (11). Yéning nyuratang wilangan patsasur (35) aksara wilangan tiga ksandingan sareng aksara wilangan lima. Sapunika taler yan nyuratang wilangan lebak (175) aksara wilangan siki kasandingan sareng wilangan papitu muwah lalime. Yan nyuratang wilangan domas (800) kasurat aksara wilangan akutus kasandingan sareng wilangan windu kembar kekalih. Sapunika selantur ipun. Dadosné tan wénten aksara wilangan sané agengan ring wilangan sia utawi wilangan sia wantah wilangan pinih ageng tur agung.

Manut murda sasuratan puniki wantah maosang kautaman miwah kaagungan wilayah sia utawi sanga. Wilangan sia utawi sanga kalintang utama tur ning sakti. Ngiring sareng-sareng titénin indik kautaman miwah kaagungan kalih kasaktian wilangan sia inucap.

Manut daging rontal Agama Hindu sane ngungguh ring rontal Lebur Sangsa sane ngungguhang indik kautaman Bhuta Yadnya. Wénten sia (sanga) wewilangan linggih Bhatara sané kasinenggah Déwata Nawa Sanga luwire: ring kaler (uttara) malinggih Ida Bhatara Wisnu kasarengin Déwata siosan. Ring kangin (Purwa) malinggih Ida Bhatara Iswara kasarengin Déwata siosan. Ring kelod (Daksina) malinggih Ida Bhatara Brahma kairing antuk para Déwata siosan. Ring kauh (Pascima) malinggih Ida Bhatara Mahadéwa kairing antuk para Déwata siosan. Ring kalér kauh (Wayabiya) malinggih Ida Bhatara Sangkara kairing antuk para Déwata siosan. Ring kalér kangin (Ersaniya) malinggih Ida Bhatara Sambhu kairing antuk para Déwata siosan. Ring kelod kangin (Gneyan) malinggih Ida Bhatara Mahéswara kairing antuk para Déwata siosan. Ring kelod kauh (Neriti) malinggih Ida Bhatara Ludra kairing antuk para Déwata siosan. Kaping untat ring tengah malinggih Ida Bhatara Siwa kairing antuk para Déwata siosan.

Tahun saka maderbé roras sasih wastan sasih inucap inggih punika sasih kasa, karo, katiga, kapat, kalima, kanem, kapitu, kasanga, kadasa, desta, sada. Yening tahun masehi ngawitin tahun ri kala sasih siku (Januari) sasih sané panelas wantah sasih roras (Désémber). Nangin bina pisan ring tahun isaka, ngawitin ring sasih kadasa, sasih sané panelas wantah sasih kasanga, nimbalang tahun ring penanggal apisan ring sasih kadasa. Yéning tahun masehi penimbalan tahun inucap (pergantian tahun) ri tatkala galah pukul 00.00 tengah wengi kasambut antuk upacara sané meriah tur ramé. Nanging pagentosan tahun kasange kasambut antuk kayun ning sepi tur sipeng sane kawastanin upacara Brata Penyepian saking semeng kantos benjang semengné. Ri kala upacara Nyepi umat Hindu patut ngamargiang Catur Brata Penyepian luwiré: amati geni, amati karya, amati lelanguan miwah amati lelungaan. Sané pinih utama ri kala upacara Nyepi sarenga sami patut ngulat sarira utawi introspéksi diri mitetin indria miwah momoanggara negtegang kayun.

Punapi awanan pagentosan tahun isaka ri kala sasih kasanga? Manut sakadi punapi sané kapangguhang ring daging rontal utawi buku Agama, duaning wilangan sia inucap wilangan pinih ageng agung tur sakti. Kesaktian wilangan sia inucap kanten pisan yan pradé wilangan sia kapinggelan (dikalikan) ring wilangan akuda ja (sajawaning wilangan windu/nol) hasil ipun sinah mawali kasia. Conto sané katur.

9 x 3 = 27 (2+7) = 9)

9 x 18 = 162 (1+6+2) = 9)

9 x 35 = 315 (3+1+5 = 9)

9 x 475 = 2475 (2+4+7+5 = 18. 1+8 = 9)

9 x 1137 = 10233 (1+0+2+3+3 = 9)

Boya ja anak Bali kémanten sané percaya ring parindikan inucap. Wénten Dokter saking Jerman magenah ring Pajang Mataram Lombok Barat mawasta Pak Mangku Gedé (Gedé Putra Handriawan penganut Hindu panatik sampun dados Jro Mangku). Dané matetambaan dados Balian, Ilmu Kadokteran kaaworang (digabung) sareng usada. Ngicen tamba para pasién akéhné sinah ganjil marupa pil utawi Kristal pakardinnyané. Soang-soang kacampuh antuk toya sia séndok tur kainum ping sia sanunggil limang menit.