Apa tujuan idup jlema Balinè? Mokshartam Jagadhita Ya Ca Iti Dharma konè.

“Artine pas idup ngerasain bahagia, pas bangka ngemasin moksa, manunggal jak anè maraga Mbang,”
kèto abetnè I Wayan Musang Berbulu Ayam.Krama sekaa tuakè anggut-anggut makejang. Yèn urusan jagadhita lan moksha nak konyangan ba ngerti artinè. Ba sasai ningeh darmawacana di pura, radio lan tipi. Nanging, kanti jani nak mula tondèn taèn nepukin nyama anè seken-seken jagadhita idupnè, apabuin anè kanti nyidang moksa.Tuah I Madè Kerakap Tumbuh Dibatu gèn anè sing bareng anggut-anggut. Nrawang-nrawang matanè.”Artinè jani sebagai jlema Bali tujuan idup anè nu nyidang ender Cang to tuah Moksa,” kèto abetnè.Makesiap krama anè lènan. Yèn ba dadi anggota sekaa tuak, sujatinè ba otomatis kehilangan kesempatan ngalih moksa. Maklum, yèn ba sesai punyah, nak sing sempat matepuk jak anè maraga Mbang. Yèn sesai punyah, paling mungkin matepuk jak bangbang.”Maksud Cangè, ba petang dasa umur Cangè jani tondèn masi ngemasin Jagadhita artinè kan ba sing lakar ada kesempatan buin,”

Mula menderita idupnè I Madè. Gegaènè tuah dadua, matajen lan mamitra. Kadadua karirnè to gagal ngemang ya kebahagiaan.

“Kalingkè lakar maan darma, arta lan kama gèn ba sing bakat tepuk,”

Tajen laranga kèn pemerintahè. Kema-mai I Madè mengkeb-mengkeb matajèn. Sing masi taèn ngemasin menang liu. Pamuputnè anteg umah abungkul magadè anggo mayah utang.

“Amonto dedikasi lan komitmen Cangè kèn tajèn. Sing taèn Cang nyoba anè lènan, sing taèn bola adil apabuin togèl. Kanti seket taèn ngelah kurungan. Sing masi dadi apa. Pocol cang berkarir di Tajèn,”

Karir mamitranè patuh masi. Amonto pengabdiannè I Madè kèn mitra-mitranè, kanti ngutang kurenan, ngutang panak, tur ngalahin ayahan, tetep masi pamuputnè sing ada apa. Konyangan malaib, sambilanga ngaba dompèt, motor, sertifikat tur konyangan gelahnè I Madè.

“Jani jeg moksa lakar enderin. Yèn ba moksa, ba manunggal jak Ida Sanghyang Widi Wasa sinah apa anè kenehang Cang lakar berhasil, keneh ngaè tajèn terbesar sedunia, keneh ngelah kurungan sejuta, keneh mamitra jak Julia Perez, sinah langsung terjadi, kan Cang ba dadi mahakuasa, sing kèto?”

Kèkèk-kèkèk I Madè, krama sekaa tuakè anè lènan bengong lala-lèlè.

“Yèn moksa to artinè Ci ba bangka Dè. Yèn ba maraga Mbang, masak nu ngerunguang tajèn lan mitra,” frustrasi I Wayan nyelag.

I Madè masi frustrasi.

“Beh, artinè pas idup Cang sing nemu kebahagiaan, pas bangka masi sing ngemasin demen?”

Apa tujuan idup jlema Balinè? Liunan sing ngalih jagadhita, liunan sing ngedotang moksa, liunan tuah dot ngulurin demen