Bayuh oton manut I Nyoman Singgin Wikarman ring buku Bayuh Oton Ruwatan Menurut Kelahiran, gumanti wantah upacara yadnya nganutin pawetonan sang sané mabayuh matetujon nyomya pengaruh-pengaruh sané nénten becik sané nyarengin sang sané kabayuh. Kruna bayuh kabaos metu saking kruna dayuh. Malarapan antuk upacara bayuh oton kaaptiang mangda sang sané kabayuh sayan-sayan dayuh. Pamuputné mangda prasida ngemangguhin kerahyuan rikala nyanggra kauripan ring jagaté.

Bayuh oton ring Jawa kabaos ruwatan. Ruwatan metu saking kruna ruwat sané kategesin nyuciang. Risampuné suci kaaptiang mangda sang sané kabayuh taler prasida nyomya sahananing mala sané wénten ring angga sang sané kabayuh.

Manut penulis buku-buku agama Hindu, Drs. I Ketut Wiana, M.Ag., duaning bayuh oton pinaka upacara nganutin dina otonan, soang-soang dina utawi wuku madué upacara bebayuhané soang-soang. Nika mawinan, soang-soang jadma madué bebayuhan sané matiosan nganutin dina otonannyané.

“Srana wewantenan bayuh oton jadma sané embas ring wuku Sinta, matiosan sareng jadma sané embas ring wuku Landep,” baos Ketut Wiana.

Ketut Wiana nlatarang upacara bayuh oton kamargiang sangkaning soang-soang jadma satata mabekel pengaruh sané becik miwah pengaruh sané nénten becik. Ring kauripané puniki, kaaptiang mangda pengaruh sané becik punika sayan-sayan nincap ngasorang pengaruh sané nénten becik.

“Pengaruh sané nénten becik nénten prasida antuk ngicalang, wantah ngirangin kémanten. Bayuh oton wantah srana upacara ngirangin pengaruh sané nénten becik punika. Mangdané pengaruh sané nénten becik punika somya turmaning nénten ngwetuang kaon majeng sang jadma punika,” baos Ketut Wiana.

Dosén Jurusan Basa lan Sastra Bali Univérsitas Pendidikan Ganésha (Undiksha) Singaraja, IB Putra Manik Aryana maosang bayuh oton mangkin kamargiang sangkaning makudang-kudang pamargi. Kapertama, bayuh oton kamargiang sangkaning uning dina otonan anaké alit nénten becik. Nika mawinan, bayuh oton kamargiang sadurung anaké alit nincap yusannyané.

Kaping kalih, bayuh oton kamargiang sangkaning anaké alit kekantenang malaksana sané nénten anut utawi matiosan. Risampuné katakénin ring sang sané uning risajeroning wariga, raris kabaosang anaké alit patut kabayuh duaning dina otonnyané nénten becik. Kaping tiga, bayuh oton kalaksanayang sangkaning anaké alit keni bencana utawi kebrebehan.

“Sané makéh wantah pamargi sané kaping kalih lan kaping tiga. Kakantenang dumun kawiaktyannyané ring sekala raris wawu kaadungang sareng tenung wariga indik dina otonannnyané, wawu kawéntenang bayuh oton,” baos IB Putra Manik.

Sané dados untengnyané, manut IB Putra Manik Aryana, bayuh oton wantah pamargi ring sekala. Pamargi upacara bayuh oton patut kadasarin antuk manah sané sumeken saking sang madué karya. “Yan baos sakadi mangkin, bayuh oton wantah kadasarin antuk keyakinan. Yaning nénten yakin, sinah méweh antuk,” baos IB Putra Manik.